Total sum of money wey govment spend on cooked meals give vulnerable people during de Covid-19 lockdown dey raise questions among Ghanaians.
Finance Minister, Ken Ofori-Atta reveal during mid-year budget review say govment spend GH¢54.3 million ($9,383,487) on cooked food to some 470,000 families within Accra and Kumasi during de three-week lockdown.
Some of de meals dem share dey include fried rice and chicken, kenkey and fish, jollof rice den stuff give de vulnerable groups.
Check out estimated breakdown of de figure
So govment spend GH¢54.3 million on 470,000 people for 21 days of daily meal packages.
On average, de estimate of one food pack go cost like GH¢5.
So for how much each person go spend dis go be GH¢5×21 days = GH¢105
Now make we multiply GH¢105×470,000= GH¢49,350,000
Total amount wey we arrive at be GH¢49,350,000, so make we subtract am from de GH¢ 54,300,000.
Therefore GH¢ 54,300,000- GH¢49,350,000 = GH¢4,950,000.
After de calculations you go get difference of GH¢4,950,000.
We no sure what dis figure dey cover but e fit cover things like service charge and transport.
President Akufo-Addo on March 27 place Accra and Kumasi under lockdown sake of de spread of Covid-19 within these regions.
De lockdown wey last three weeks create massive inconvenience give vulnerable groups like head porters, de homeless, street dwellers den stuff who dey feed on dema daily wage.
A cross section of Ghanaians however feel de figure no dey correspond to de meals dem share, quality of de food den stuff.